21/01/2013 15:44:43

Kritere të reja për doktoraturat

Studentët e rinj të doktoraturës do të udhëhiqen nga personeli akademik me titullin Profesor ose Profesor i asociuar, ose me gradën shkencore Doktor (PhD), të fituar pranë universiteteve perëndimore

TIRANE - Proçedurat për ciklin e tretë të studimeve, doktoraturat , këtë vit kanë kritere të reja, jo vetëm për kandidatët, të cilët duhet të kenë përfunduar një master shkencor, por edhe mentorët.

Studentët e rinj të doktoraturës do të udhëhiqen nga personeli akademik me titullin “Profesor” ose “Profesor i asociuar”, ose me gradën shkencore “Doktor” (PhD), të fituar pranë universiteteve perëndimore.

Për t’u pranuar në një program studimi të doktoraturës, kandidati duhet të zotërojë diplomë të ciklit të dytë të studimeve “Master i shkencave” dhe të çdo diplome tjetër, e vlerësuar e barasvlershme me të në fushën e programit të doktoratës apo në një fushë të përafërt të përcaktuar më parë në rregulloren e programit përkatës të doktoratës.

Kriteri kryesor për të aplikuar në kryerjen e doktoraturës është kryerja e masterit shkencor ose zotërimi i një diplome 4-vjeçare. Kandidatët duhet të kenë së paku një diplomë të fituar në institucione universitare brenda ose jashtë vendit në nivel ose Master Shkencor apo të ekuivalentuara me to nga ana e Ministrisë së Arsimit dhe Shkencës, të specifikuar nominalisht në fushën ku studentët dëshirojnë të aplikojnë, sqaron Ministria e Arsimit. Një tjetër kriter i rëndësishëm është një mesatare note prej jo më pak se 8 në kuadrin e studimeve të nivelit “Master Shkencor” ose 4-vjeçar të dikurshëm (pa përfshirë notën e diplomës).

Kuotat janë të ndara sipas tri kategorive. Për kandidatët brenda territorit të vendit janë përcaktuar 1141 kuota. Për trojet 154 kuota, ndërsa për shtetasit e huaj 10 kuota. Për të aplikuar për regjistrim në studimet doktorale kandidatët duhet të zotërojnë diplomën e ciklit të dytë të studimeve.

HermesNews - ©2013

Dërgo me email | Stampo artikullin